Kjo nuk është hera e parë që opozita zgjedh të bojkotojë Kuvendin. Pas Shkodrës, Elbasanit dhe Durrësit, këtë herë opozita ka zgjedhur të zhvillojë mbledhje me strukturat e saj në qytetin e Vlorës.
Në krah të kreut të PD-së, Lulzim Basha, kanë qenë kryetarja e LSI-së Monika Kryemadhi, dhe kreu i PDIU-së Shpëtim Idrizi. Sikundër është bërë e udhës, kreu demokrat Basha ka hedhur akuza mbi qeverinë dhe kryeministrin Edi Rama.
Kryedemokrati ka thënë se drejtësia është në kolaps, po kështu edhe shteti. Ai ka vënë alarmin, duke nënvizuar se ndodhemi në emergjencë kombëtare.
“Në sallën e Kuvendit, një mazhorancë e inkriminuar po ndërmerr një akt të paprecedentë në historinë e Evropës. Edi Rama dhe hajdutët dhe kriminelët e tij në Parlament, bashkë me një tufë delesh u kapën flagrant në vjedhje, përmes një proceduare të përshpejtuar për grabitjen e pronës publike, që të ngrinin 7 kulla me një vlerë 200 milionë euro. Nga Uashingtoni në Bruksel nuk ka njeri që nuk e kupton se Edi Rama është një hajdut me damkë. U kapën në një akt vjedhje.
Nuk ka prokuror për të gjykuar banditët, kjo është vepra e Edi Ramës me Reformën në Drejtësi, që është kthyer në instrument të politikës së lidhur me krimin. Shullazi, Tahiri e Rama janë një. Drejtësia në kolaps, shteti në kolaps, pa Gjykatë Kushtetuese, pa prokuror, nuk mund të jetë zgjidhja për Kuvendin.
Ne ndodhemi në emergjencë kombëtare, Prokuroria ka rënë siç e demonstron rasti Shullazi”, deklaroi kreu i PD-së.
