Zëdhënësi i Presidentit të Republikës, Tedi Blushi ka reaguar në lidhje me dhënien e shtetësisë për dy indianë të kërkuar nga drejtësia, për një mashtrim të disa bankave që kap vlerën mbi 725 milionë dollarë.
Blushi shpjegon procedurën për dhënien e shtetësisë shqiptare dy vëllezërve Nitin Jayantilal Sandesara dhe Chetankumar Jayantilal Sandesara.
Sipas tij janë zbatuar procedurat ligjore bazuar “Për shtetësinë shqiptare” të ndryshuar, me propozimin e Ministrisë së Turizimit dhe Mjedisit.
“Për shkak të eksperiencës në investime dhe historikut të sipërmarrjeve të suksesshme jashtë Republikës së Shqipërisë dhe për shkak të angazhimit të tyre për realizimin e investimeve të rëndësishme elitare në vendin tonë”.
Bazuar në pikën 6, të nenit 9 të ligjit për shtetësinë, janë bërë verifikimet përkatëse nga agjencia ligjzbatuese nga e cila nuk kanë rezultuar të dhëna problematike për dhënien e shtetësisë shqiptare.
Mashtrimi prej 725 milion dollarësh i Nitin Sandesara dhe Chetankumar Sandesara do të zbulohej ne 2018, kur një prej drejtorëve të bankave iu kap një pagesë rryshfet dhënë nga dy vëllezërit. Vëllezërit Sandesara dhe dy drejtuesit e kompanive të tyre u shpallën në kërkim nga drejtësia indiane por mundën të arratiseshin për Emiratet e Bashkuara.
