20 Nëntori shënon pesë vite nga ndarja nga jeta e Sokol Olldashit. Në këtë ditë nuk kanë munguar mesazhet e kujtimit nga miq të tij dhe familjarë.
Po duket se për të vëllanë e deputetit të ndjerë, Ardian Olldashi, disa persona janë kujtuar vonë, dhe këtë e ka thënë publikisht në një status në rrjetet sociale.
Në një mesazh të publikuar në faqen e tij në Facebook, vëllai i deputetit të ndjerë shkruan duke mos u kursyer për ish-kryeministrin Berisha dhe kryetarin e PD, Lulzim Basha.
“NE EMER TE TIM VELLAI
“Democrazia e narcizizmit” e mbarsur me gjeste te bujshme, deklarata boshe, fraza të prera me masë për rrethanat dhe interesat në rrjetet sociale, me bind edhe një herë që populli shqiptar është më i mirë se politikanët që ka. Sidomos e kam fjalën për atë pjesë të klasës politike që nuk arriti kurrë të ishte opozitë. Në vend që të ndërmerrnin rrugë të reja, ndoshta të veshtira dhe të rrezikshme, preferuan të thaheshin, te atrofizoheshin së bashku me partinë e tyre.
Koha është mësuesi më i mirë. Koha po tregon se ç‘bënë. Si karroca pa kalë në tatepjetën e deshtimit, kërkojnë të kapen kudo. Kapen tek datat perkujtimore (të gabuara si çdo gjë që bënë në jetë), për të mos perfunduar në faqen qesharake të historisë, si ata që shkatërruan, përdhunuan, keqpërdoren besimin dhe shpresën e manipuluar të demokrateve të vërtetë.
Nuk u “kujtuat” me vetëdije per Sokol Olldashin një muaj pasi ishte larguar në kongresin tuaj të rimëkëmbjes. Kujtoheni pese vjet pa një ditë më pas në luginën tuaj të lotëve, ku prisni që mëshira e kohës, ndoshta kur do jeni zbardhur vetem nga flokët t’ju falë edhe një herë pushtetin qe nuk dini ta fitoni.
Ju dhe ipertrofia juaj e Unit jeni përgjegjës historikë të kësaj katastrofe që demokratët e vërtetë nuk ju kishin borxh”.
