Para pak muajsh Këshilli Bashkiak i Tiranës miratoi me 31 vota nga 61 anëtarë, propozimin e Bashkisë së Tiranës për rritjen e çmimit të ujit të pijshëm, nga 45 lek/ m3 në 65 lekë/m3.
Konkretisht, 25 vota ishin nga PS, dy të LSI (Genta Mezini dhe Agim Kraja), tre të PDIU dhe një e FRD, duke i hapur kështu rrugë Bashkisë së Tiranës për të kërkuar rritjen e çmimit të ujit nga Enti Rregullator i Ujit (ERU).
Gjatë gjithë kohës, kryebashkiaku Veliaj është “fshehur” pas rritjes së çmimit të ujit, duke u kapur te ajo që e quan furnizim i Tiranës me ujë të pijshëm në 24 orë.
Madje, Veliaj edhe u bëri moral shqiptarëve, teksa tha se “le të kursejnë një kafe prej 70 lekësh dhe të paguajnë ujin, që është shumë i rëndësishëm”.
Jo vetëm kaq, por kryebashkiaku Veliaj shkeli premtimin e tij, të bërë më 24 gusht 2016, ku tha se kompania Ujësjellës Kanalizime Tiranë do të privatizohet, por atëherë ai siguronte që çmimi i ujit nuk do të rritej.
Tashmë, pas rritjes me 40% të çmimit të ujit, privatizimi i UKT-së do të sillte një tjetër rritje.
Kjo denoncohet edhe nga këshilltarët e PD-së, të cilët dolën në një konferencë për shtyp paraditen e sotme.
Duke iu referuar padisë që Veliaj ka bërë ndaj këshilltarit Akil Kraja, lidhur me një deklaratë të këtij të fundit, këshilltari Kreshnik Çollaku tha se demokratët nuk tremben me persekutime dhe dhunë verbale:
“Nga njëra anë është pushteti që angazhohet për të liruar trafikante dhe nga ana tjetër që mundohet të korruptojë çdo zë qytetar.
Ka dy këshilltarë të paditur, një nga një ish-ministre që ka qejf të luajë me radarët dhe njëra nga një kryetar bashkie, që ka qejf të luajë me taksat. Banorët na kanë votuar që taksat të mos ngriten, ata kanë përcaktuar detyrën tonë. Ne jemi të gatshëm për ta kryer këtë detyrë, ashtu siç bëri Akil Kraja, në mbrojtje të interesit të qytetarëve. Kundër tij është ngritur një padi, pas deklaratës se 40% e ngritjes së çmimit të ujit është ngritur.
Ne sot jemi të gjitha këtu të paditur, sepse po kryejmë detyrën tonë. Kam një mesazh për kreun e Bashkisë dhe kryeministrin e tij:
Nëse mendoni se me këto do trembni demokratët, i keni bërë hesapet krejt gabim. PD lindi nga dhuna e diktaturës, ajo vetëm na forcon dhe është dëshmi se jemi në një kauzë të drejtë!”
Edhe këshilltari Akil Kraja foli para medies, teksa publikoi në monitor videon e Veliajt ku ky i fundit premtonte se çmimi nuk do të rritej, teksa fliste për privatizimin e UKT-së:
“Një turbullim i padrejtë të gjendjes shpirtërore të Erion Velijat. Ky është pretendimi i Erion Veliajt për padinë e tij, pasi ne kemi denoncuar rritjen prej 40% të çmimit të ujit.
Kjo deklaratë kishte vetëm një qëllim: sensibilizimin e qytetarëve. Më mirë se faktet çdo gjë do të ishte e tepërt. Veliaj thotë se po negocion privatizimin e ujësjellësit, por çmimi nuk do rritet. Çfarë ndodhi? Çmimi u rrit. Imagjinoni çfarë ndodh pas privatizimit të UKT-së”, tha Kraja. TIRANA TODAY
