Bashkia e Tiranës ka përdorur aplikacionin emergjenca.net për të përfunduar me shpejtësi procesin e verifikimit dhe vlerësimit të dëmeve që shkaktoi tërmeti i një jave më parë. Ky proces ka përfunduar në të 1220 banesat e prekura.
Kryetari i bashkisë së Tiranës Erion Veliaj tha në panairin “Tirana Tech Open” se teknologjia ka qenë aleati kryesor në rimëkëmbjen e qytetit pas tërmetit, e falë saj sot ka nisur rindërtimi i disa shtëpive të pabanueshme nga lëkundjet sizmike.
“Teknologjia ta bën jetën më të lehtë për disa procese që më parë na merrnin shumë kohë. Ne kemi përfunduar të gjithë procesin e verifikimit dhe vlerësimit të 1220 banesave të dëmtuara nga tërmeti. U bë në një kohë rekord, jo vetëm në Shqipëri, por në Rajon e besoj në pjesën më të madhe të Europës,” tha ai.
