Vazhdojnë protestat pas vdekjes së Florenc Beqirajt në Francë. Sot janë mbledhur në Shkodër qytetarë të komunitetit egjiptian, të cilët kërkojnë dorëheqjen e ambasadorit shqiptar në Francë.
Protesta vjen pas neglizhencës së ambasadës ndaj këtij rasti, ndërsa ambasadori shqiptar në Paris Dritan Tola tha dje për News 24 se deri tani nuk ka asnjë indikacion se ndaj Beqirajt është përdorur dhunë.
“Duam drejtësi! E vrau, e vrau policia. E vrau, e vrau qeveria”, këto kanë qenë thirrjet e protestuesve.
Edhe në Tiranë qytetarë të shumtë janë mbledhur dje, të cilët protestuan pranë Piramidës dhe më pas përpara ambasadës franceze.
Nga ana e kryeministrit Edi Rama nuk ka pasur asnjë reagim, ndërsa këshilltarët e presidentit Meta kanë shkuar në shtëpinë e familjes së të ndjerit, të cilëve u kanë premtuar se do të bëjnë gjithcka për kthimin e trupit të Beqirajt në Shqipëri.
Po ashtu, Ministria e Jashtme Shqiptare mori përsipër para pak ditësh të luajë rolin e ekspertit, teksa tha se i riu nga Shkodra nuk kishte asnjë shpresë për të jetuar, për shkak të mosfunksionimit të trurit, ndërsa shtoi se kjo situatë ka ardhur si pasojë e një tentative për vetëvrasje, ndërkohë që familjarët e Florencit e kanë hedhur poshtë këtë variant, duke shtuar se ai mund të jetë dhunuar nga policia, ose nga të burgosurit e tjerë.
