Kreu i grupit parlamentar të LSI-së, Petrit Vasili ka dalë sot në një konferencë për shtyp, ku foli mbi taksimin e biznesit të vogël, gjë që e cilësoi si “lajthitje” nga ana e kryeministrit.
Gjatë fjalës së tij, Vasili përmendi dy fragmente nga fjala e Ramës në kohë të ndryshme: në 2015 ku Rama i hoqi taksën biznesit të vogël dhe tani që ai e përfshin në skemën e TVSH-së.
“Grupi mori në shqyrtim qëndrimet lidhur me biznesin e vogël dhe vendosjen e TVSH-së. Kryeministri i paaftë dhe i paditur nuk di ç’thotë. Për të qenë konkretë me opinion publik, po citoj çfarë thotë kryeministri:
Në nëntor 2015 – kur ia hiqte detyrimet biznesit të vogël thoshte: Rezultatet e para të këtij operacioni ua dedikoj juve, këto para do të jenë për ju, për ata që vetëpunësohen. Biznesin e vogël e kemi aleat në luftën kundër informalitetit.
Në tetor 2017 kur i vuri taksën, tha se s’duhet që TVSH të bjerë në xhepin e një grupi të pasurish, ka biznese që qahen si të vegjël, por nuk janë të tillë.”
Gjithashtu, Vasili e sugjeroi Ramën që të linte shpjegimet në Facebook, ndërsa tha se është me rëndësi që me anë të Reformës Zgjedhore të ndalohet shit-blerja e votës dhe përfshirja e kriminelëve në fushatë zgjedhore.
“Kryeministri të lërë shpjegimet në Facebook. Të premten që lamë pas, ne kaluam vendimin për komisionin e përbashkët për reformën zgjedhore. Thelbi dhe dy shinat ku duhet të ecë reforma është që të ndalohet me çdo kush shit-blerja e votës dhe përfshirja e kriminelëve në fushatë zgjedhore. Kjo do të çonte në zhytjen e vendit në antidemokraci të thellë. Po s’u dhanë këto përgjigje të qarta klientët dhe baronët e drogës do mbajnë telekomandën e pushtetit dhe vrasin të drejtën e pasurojnë oligarkët”, përfundoi Vasili.
