Kryetari i grupit parlamentar të LSI, Petrit Vasili tha se forca politike që ai bën pjesë është gati për zgjedhje të parakohshme.
I ftuar në studion e lajmeve të Ora News ai tha se LSI është gati që nesër, ndërsa theksoi se kusht i panegociueshëm është rrëzimi i Ramës.
Pjesë nga intervista
Është koha, është momenti a është gati opozita për zgjedhje të parakohshme?
Që nesër!
Ky është një skenar që LSI e mbështet,që të shkohet në zgjedhje të parakohshme?
Që nesër, jo për të mirën e opozitës, por për të mirën e një Shqipërie që ka mbetur e mbërthyer në kthetrat e kriminelëve dhe trafikantëve.
Po çfarë ka ndryshuar nga një vit më parë?
Shkalla e denoncimit dhe ndërgjegjësimit dhe inkriminimit është sot shumë herë më e fortë se një vit më parë dhe për këtë mijëra qytetarë janë aty dhe mbështesin dhe i përgjigjen thirrjeve tona edhe në aktivitete shumë të mëdha që zhvillohen brenda pak ditësh.
Vetë LSI ka sondazhe, ka matje të opinionit publik?
Ju e dini shumë mirë që ne punojmë me to, jemi shumë objektiv me to. Edhe ju e dini që ne i qëllojmë në shenjë ato që bëjmë.
Do ta kërkoni këtë skenar për zgjedhje të parakohshme, apo rrëzimi i Ramës është prioritet ?
Rrëzimi i Ramës është kusht i panegociueshëm pasi është një njeri që ka marrë përsipër, jo thjesht të shkatërrojë këtë vend, sepse ky është një fakt, por marrëzia e cila nuk kursen të shprehet edhe në mediat e kolegëve tuaj. Ju e dini pak më parë u bë publik një intervistë e tij kur tha se nuk ka problem as që shqiptarët të ikin në emigracion, as që plagosen shqiptarët.
Në lidhje me hetimet për audio përgjimin, ku pretendohet se është i përfshirë në trafik droge edhe vëllai i ministrit të Brendshëm, Vasili tha se Prokuroria nuk duhet të kishte lejuar largimin e Agron Xhafajt. Sipas tij ky nuk është një hetim i drejtë.
Prokuroria nuk duhet të kishte lejuar në asnjë rast që vëllai i ministrit të Brendshëm, i përfshirë në këtë çështje nuk duhet të lejohej të dilte nga Shqipëria. Të hapej çështja penale, të ndiqej padia që ky i kishte bërë deputetëve përkatës, të verifikohej gjithçka dhe pastaj meqë ky kishte padurim të shkontë në Itali për të vuajtur dënimin mund të shkonte ta vuante dënimin, të cilin kishte patur durimin të pristë për 15-16 vjet. E gjithë kjo e bën shumë të errët situatën, pasi pse i indiciuari kryesor u la të ikte, ndërsa dëshmitari X u gjet shumë shpejt, u mor, u pyet nga prokuroria. Çfarë është ky standard? Kë mund të bindi?! Nëse dikujt i pëlqen që kjo është korrekte unë thëm që kjo nuk është drejtësi, ky nuk është hetim. Do të thotë që ka një hetim të bërë copa, të ndarë në mes pikërisht për të krijuar mundësitë e bërjes pis të hetimit, shumë thjesht!
Në lidhje me protestën e 26 majit, Vasili tha se LSI ishte në sinkron me Partinë Demokratike, që ai tubim të përfundonte në mënyrë paqësore.
