Kreu i grupit parlamentar të LSI-së, Petrit Vasili ka dalë në një konferencë për mediet, ku sulmoi kryeministrin pas mbledhjes që ky i fundit bëri me drejtues të Policisë së Shtetit.
Vasili tha se vetë Rama ka zhveshur me çdo lloj morali Policinë e Shtetit, duke i lënë hapësirë krimit që të ulej madje në karriget e qeverisë.
Po ashtu, deputeti i bëri thirrje Ramës që të ketë kujdes me telefonatat dhe kërcënimet pasi po vëzhgohet, ndërsa shtoi se e mërkura është dita e provës së kryeministrit Rama.
FJALA E VASILIT:
Kryeministri i vendit sot ishte në Policinë e Shtetit, ky ishte rikthim tipik i vrasësit në vendin e krimit pasi në këtë moment, njeriu që ka zhveshur me çdo lloj morali Policinë e Shtetit është vetë Edi Rama që zgjodhi ta drejtojë atë që në 2013. Në këto 4 vjet, Rama e mbolli Shqipërinë me drogë anë e kënd, i hapi hapësira pa fund krimit që të ulej në karriget e qeverisë, Rama zgjodhi që të përgatiste e vinte në veprim edhe krimin elektoral të 25 qershorit, ku ai e veshi policinë dhe i kërkoi që të shkonte dhe të ishte aktore elektorale.
Rama zgjodhi aparencën e Plicisë së Shtetit, të rripave te sigurisë dhe të gjobave në rrugë, kurse në brendësi të saj kishte një dorëzim të plotë para krimeve dhe trafiqeve. Kjo nuk është policia që shqiptarët duan, ky është vetëm kthim i Shqipërisë në një narko-shtet që drejtohet nga një narkotrafikant.
Ende ekzistojnë prova shumë të forta për kryeministrin dhe prova më e fortë është e mërkura. Të mërkurën ky kryeministër që llomotit pa fund ka një provë: të vendoset me krimin, apo kundër tij, bëhet fjalë për krim të organizuar, të vendoset në anën e ligjit, apo të antiligjit.
Mbas votimit të djeshëm, kam edhe një thirrje edhe të karakterit institucional.
Kryeministër bëj kujdes, sepse sigurisht halli i madh t’i ka errësuar sytë, por bëj kujdes edhe me komunikimet telefonike, edhe me lëvizjet, edhe me telefonatat, edhe me kërcënimet apo joshjet që bën pasi të gjithë janë të vëmendshëm te ti.
