Kryetari i Grupit Parlamentar të Lëvizjes Socialiste për Integrim, Petrit Vasili, ka deklaruar se projektbuxheti për vitin 2018 është i pamundur dhe i pavotueshëm nga LSI.
Në një dalje për mediat, Vasili tha se projektbuxheti i paraqitur mbart rrezikun e pastrimit të parave të pista nëpërmjet koncesioneve, partneritetit publik-privat, pa tender, por si dhuratë për klientët e pushtetit.
Sipas tij, problem është taksa mbi biznesin e vogël ku vihen re risqe ekonomike kombëtare prej taksave dhe tatimeve. “Qeveria nuk jep asnjë burim të besueshëm ekonomik, e si pasojë edhe të bizneset e huaja nuk vijnë në Shqipëri për të investuar, apo ato që janë largohen. Unë e sfidoj qeverinë, ku pres të më thotë një investim të huaj që po bëhet në vendin tonë. Shqipërinë e presin ditë të errëta në rritjen e ekonomisë”, tha Vasili.
Ky i fundit shtoi se projektbuxheti për vitin 2018 po i përzë dhe po i largon shqiptarët. “Ky projektbuxhet ka qasjen e pasurimit të qeverisë dhe varfërimin e njerëzve të thjeshtë. Është një buxhet që thellon papunësinë dhe varfërinë”, tha kreu i Grupit Parlamentar të LSI-së.
