Përmes një prononcimi për mediat, kreu i grupit parlamentar të LSI, Petrit Vasili, duke iu rikthyer debatit të banorëve të ‘Astirit’, tha se po bëhet vjedhje në mënyrën më të çmendur. Sipas tij, për ndërtimin e ‘Unazës së Re’, do përdoret asfalt më i shtrenjtë se floriri. Në vazhdën e akuzave, Vasili u shpreh se Prokuroria shqiptare ka zgjedhur të jetë bashkë hajdute në këto tendera me qeverinë.
“Përse kjo gjuhë rrugaçërore? Arsyeja është shumë e thjeshtë. Për arsye të 40 milionë eurove, që do ndërtojnë 2.2 km rrugë.
Ua kam thënë edhe dje, të një asfalti të Edi Ramës, i cili është më i shtrenjtë se floriri.
Pra te rruga tek ‘Astiri’, do të kemi një asfalt më të shtrenjtë se floriri. Ku e ka burimin? Cila është bushtra që pjell korrupsionin?
Është pikërisht e njëjta qeveri, e cila bën tendera, pavarësisht se Prokuroria shqiptare ka zgjedhur të jetë bashkë hajdute në këto tendera.
Ja ku i keni qytetarë. E dini çfarë keni këtu? Keni 3 tendera. Një copë rruge 2.2 km është ndarë në 3 copa. Qytetarë, ju lutem jini të vëmendshëm. Bëhet fjalë për një vjedhje ku pranohet në mënyrën më të çmendur dhe më të pacipë në botë, të konkurrojnë firma me zero lekë”.
