Zv.ministrja e Shëndetësisë, Mira Rakacolli deklaroi se ka dyshime të forta, që varianti indian i koronavirusit, Delta, është i pranishëm në vendin tonë, por pritet një konfirmim nga laboratorët e referencës në Gjermani.
Deklarata e Rakacollit u bë mbrëmjen e sotme në një intervistë për ora News. Sipas Rakacollit, nuk mund ta dallojmë nëse jemi të infektuar me variantin Delta, pa shkuar te mjeku, sepse shenjat janë pothuajse njësoj edhe me variantet e tjera të virusit.
Mira Rakacolli: ”Ka dyshime të forta që virusi Delta është i pranishëm në Shqipëri. Ne po presim një konfirmim nga laboratorët e referencës që kemi në Gjermani. Përsa i përket mbrojtjes së variantit Delta të vaksinave duhet të presim edhe pak duke qenë se është një variant i ri, pro studimet laboratorike tregojnë që janë efikase. Dyshimet ngrihen jo thjesht nga shenjat, sepse shenjat janë pak a shumë njësoj, pra mbizotëron shenja e infeksionit të rrugëve të sipërme respiratore. Ka pasur çrregullime post vaksinimit, por ne jemi shumë vigjilentë për këtë punë. Ne kemi të ngritur Komitetin për vlerësimin e efekteve anësore të vaksinave qëkur filloi fushata e vaksinimit. Efekte anësore ka pasur, por jo efekte të rënda si raste e trumbozës apo paralizës.”
