Pavarësisht masave të marra, Italia nuk po njeh shenja përmirësimi nga të infektuarit. Situata mbetet po me të njëjtat ritme, ku të infektuarit po shtohen në masë. Ndodhur në këto kushte, mjekët italianë i kanë kërkuar qeverisë të vendosë masa më agresive për të frenuar përhapjen e virusit, nga frika e një “cunami” në spitalet e vendit, raporton “The Guardian”.
Mjekët dhe kërkuesit, përfshirë ata që këshillojnë Ministrinë e Shëndetësisë, i kanë kërkuar qeverisë të miratojë masa më të ashpra. Kjo pasi infeksionet po rriten me shpejtësi, dhe spitalet nuk kanë më kapacitetet për ti përballuar.
Para një takimi me krerët rajonalë, për të arritur një marrëveshje për izolim vetëm të rajoneve të prekura më së shumti, Sandra Zampa, nënsekretare e Ministrisë së Shëndetësisë tha se po shqyrtohen masat e reja.
“Qeveria e Giuseppe Conte po punon për një “izolim të lehtë”, për të shmangur paralizimin e vendit”, tha Sandra Zampa.
Nga ana tjetër, Filippo Anelli, i cili është presidenti i shoqatës italiane të mjekëve, paralajmëron një cunam të vërtetë.
“Shqetësimi ynë është se kjo valë e dytë nuk do të jetë një “stuhi”, por një “cunam” që mund të mbingarkojë sistemin shëndetësor kombëtar”, ka shkruar Filippo Anelli të martën në Facebook.
“Kjo është arsyeja pse ne po kërkojmë nga qeveria masa më agresive. Nëse vazhdojmë të ecim kështu, situata mund të dalë jashtë kontrollit”, shtoi ai.
