Vëllai i Ylli Ndroqit, presidentit të ‘Ora News’, nuk e fitoi dot betejën me COVID-19. Lulzim Pasmaçiu, ditët e fundit kishte shfaqur shenja përmirësimi, por pavarësisht kësaj, nuk mundi t’i mbijetonte virusit vdekjeprurës. Një ditë më parë, Ylli Ndroqi ka reaguar me një mesazh prekës pas humbjes së vëllait të tij, teksa tregon edhe lidhjen e fortë që ishte mes tyre.
E ndërsa sot, biznesmeni ka shprehur falenderimet e tij për të gjithë ata që i kanë qëndruar pranë në këto ditë të vështira. Ndroqi uron që askush të mos përjetojë ato që po kalon ai dhe familja e tij.
“Të dashur miq! Duke falenderuar emër për emër secilin që më qëndroi pranë mua, familjes sime në këto momente të dhimbshme, ju kërkoj ndjesë për pamundësinë për t’i kthyer përgjigje mesazheve tuaja.
Janë me dhjetëra mijëra të tilla të mbërritura në telefonin tim, ndaj jam thellësisht i prekur dhe mirënjohës për secilin.
Unë dhe familja ju urojmë që kurrë në familjet tuaja të mos përjetoni atë që unë dhe familja ime po kalojmë prej muajsh”, shkruan Ndroqi në rrjetet sociale.
