Fondacioni për Fëmijë i Kombeve të Bashkuara (UNICEF) së fundmi ka paralajmëruar mundësinë e shpërthimit të fruthit, për shkak të pandemisë së koronavirusit.
UNICEF bëri me dije se disa programe të vaksinimit janë shtyrë për shkak të krizës globale shëndetësore.
Në 37 vende, 117 milion fëmijë mund të mos imunizohen me kohë ndaj fruthit, tha UNICEF.
Fruthi, i cili shkakton kollitje, skuqje dhe ethe, mund të parandalohet me dy doza të vaksinës së njohur si MMR.
Në mesin e vendeve që kanë vendosur të shtyjnë vaksinimet për fruth, janë: Bangladeshi, Brazili, Bolivia, Kamboxhia, Etiopia, Somalia, etj.
“Ndërprerja e vaksinimit rutinor do të rrisë rrezikun që fëmijët të kontraktojnë sëmundje vdekjeprurëse”, deklaroi zëdhënësja e UNICEF-it, Joanna Rea.
Vlen të theksohet fakti se fruthi është sëmundje ngjitëse dhe potencialisht fatale.
