Ndonëse sot është festa e flamurit, kjo nuk është një ditë pushimi për punonjësit e Policisë Bashkiake. Që në orët e para të ditës, ata janë vënë në veprim. Punonjësit kanë filluar nga puna në “Unazën e Re”, ku po heqin shtyllat e ndriçimit si dhe po presin pemët për të vijuar më pas me projektin e “Unazës së Madhe”.
Ndërkohë që protesta e banorëve s’ ka filluar ende, qindra efektivë të policisë janë në krye të detyrës.
Sot pritet të jetë dita e 25 e protestës së banorëve të Astirit, të cilët kërkojnë kompesim të plotë të objekteve të tyre, të cilat preken nga projekti i Unazës.
Kujtojmë këtu se edhe pasditen e djeshme, banorët e Astirit dolën në protestë. Ata mbajtën të bllokuar rrugën, siç kanë bërë për 24 ditë me radhë, ndërkohë që kanë kërkuar nga qeveria kompensim 100% të shtëpive të tyre.
Për vijimin e projektit të “Unazës së Re”, ARRSH ka vijuar me heqjen e shtyllave të ndriçimit, si dhe me prishjen e disa banesave, pronarët e të cilave pranuan bonusin e qirasë nga Bashkia Tiranë, dhe strehimin në banesat sociale. Në mbështetje të banorëve që protestojnë, janë edhe deputetë të opozitës.
