Banorët e ‘Astirit’, të cilët prej ditësh ndodhen në protestë, i janë drejtuar Autoritetit Rrugor Shqiptar, lidhur me ndërtesat që ata kanë në zonën ku pritet të ndërtohet një tjetër segment i ‘Unazës së Madhe’. Përgjegjësja e Sektorit të Sigurimit të Tokës pranë ARRSH, Holta Deda, ka sqaruar se janë pritur në një masë të madhe qytetarët e prekur nga projekti i ‘Unazës së Madhe’.
“Nga këta, 50 qytetarë kanë dorëzuar zyrtarisht dokumentet e pronësisë, dhe kanë marrë një përgjigje zyrtare. Pra, deri më tani, 50% e qytetarëve që posedojnë dokumente pronësie janë paraqitur pranë Autoritetit Rrugor Shqiptar. Janë të lutur të gjithë qytetarët që posedojnë dokumente pronësie, të paraqiten sa më shpejt pranë zyrave të ARRSH ku punohet me orar të zgjatur, deri në 20:00 të mbrëmjes”.
Sakaq, të hënën pritet që grupet e inxhinierëve të nisin vlerësimin në terren, dhe më pas qeveria do të bëjë gati VKM për shpronësimet. “Kjo në mënyrë që të mundësohet dalja e Vendimit të Këshillit të Ministrave me vlerat përkatëse të shpronësimit, në një kohë sa më të shpejtë. Gjithë ekipi i inxhinierëve të ARRSH e ndjekin me një prioritet maksimal kryerjen e procedurave ligjore të shpronësimit të Unazës së Tiranës”.
