Në Kroaci ka ndodhur një incident që nuk i shkon aspak për shtat futbollit, ultrasit e ekipit Hajduk Split kanë dhunuar në qendër të qytetit futbollistët e ekipit. I gjithë ky zemërim erdhi pas humbjes 1-2 në shtëpi përballë Dinamo Zagrebit. Tifozët si duket nuk e kanë përtypur këtë humbje dhe kur janë përballur në rrugë me lojtarët u kanë kërkuar llogari për paraqitjen në fushë dhe më pas konflikti ka degjeneruar në dhunë fizike.
Mes lojtarëve të dhunuar ka qenë edhe mbrojtësi i kombëtares shqiptare, Hysen Memolla. Pesë tifozë të ekipit fillimisht kanë sulmuar verbalisht lojtarin Said Ahmed, i cili nuk bëri një paraqitje të mirë kundër Dinamos së Zagrebit. Më pas, ultrasit e irrituar përdorën edhe duart duke goditur lojtarin e Hajduk. Për të mbrojtur shokun e skuadrës ndërhyri Marko Futacs, i cili mori disa goditje në kokë me shkelma nga ultrasit. Gjatë përleshjes ishte edhe Hysen Memolla, Hamza Barry e Savvas Gentsoglou.
Klubi i Hajduk Split dënoi aktin e tifozëve duke iu kërkuar autoriteteve të zbardhin ngjarjen dhe të vendosin agresorët para ligjit. Hysen Memolla nuk ishte prezent në fushë e as në stol për Hajduk Split gjatë ndeshjes kundër Dinamo Zagreb.
Ndërsa menjëherë pak këtij akti të shëmtuar presidenti i ekipit, Ivan Kos ka dhënë dorëheqjen nga ky post, pas humbjes në kampionat përballë Dinamos së Zagrebit. Numri një i klubit kroat i paraqiti kërkesën e tij Bordit të Mbikëqyrjes për të mbyllur bashkëpunimin mes tyre. Gjithsesi Ivan Kos do të qëndrojë në krye të klubit deri në momentin që klubi do të zgjedhë pasuesin e tij.
