Tifozët e PSG-së nuk janë aspak të kënaqur me atë që japin lojtarët e ekipit të tyre në fushë. Me anë të një mesazhi të publikuar në rrjetet sociale ultrasit kanë shprehur nervozizmin dhe kanë qenë të ashpër ndaj “yllit” brazilian Neymar. Nuk është përmendur saktësisht emri i futbollistit brazilian por gjatë gjithë shkrimit i referohen problemeve që ka hasur Neymar në fushë. Është ky mesazhi që “Collectif Ultras Paris”, pra tifozët më të zjarrtë të PSG-së kanë publikuar në mediat sociale:
Pas ndeshjes që la shumë për të dëshiruar ndaj Real Madridit, pas peripecive të një dëmtimi që u menaxhua sërish keq, larg qytetit tonë, dhe pas mungesës së tepruar të respektit ndaj klubit dhe tifozëve, e shfaqur si në fushë ashtu edhe në rrjetet sociale, ne kërkojmë nga lojtarët tanë moderim sjelljesh dhe, mbi të gjitha, respektin e merituar karshi institucionit që përfaqëson klubi i Paris Saint-Germain! Ne kemi qenë dhe do të vijojmë të jemi mbështetësit tuaj më të mëdhenj, por nuk kemi ndërmend te qëndrojmë duarkryq kur nderi i klubit tonë vijon të nëpërkëmbet! Zgjohuni, durimi i popullit kuqeblu është në limit! Allez Paris!”. Një mesazh me tone të ashpra që nuk lë vend për dyshime se ka si objektiv brazilianin Neymar, që vazhdon të qëndrojë në Brazil.
