Unioni i Gazetarëve Shqiptarë është vënë në dijeni për situatën e vështirë dhe në përshkallëzim në Republikën e Maqedonisë, për shkak të krizës politike që prej kohësh mban mbërthyer këtë vend fqinj me Shqipërinë.
Por përshkallëzimi i dhunës dhe sulmi i militantëve partiake dhe nacionalistë mbi Parlamentin e këtij vendi ka vënë në rrezik jetën e reporterëve vendas dhe sidomos atyre me kombësi shqiptare, të cilët gjendeshin aty për të raportuar rreth zhvillimeve politike.
Sipas njoftimeve të mbërritura nga mediet maqedonase dhe ato në gjuhën shqipe në këtë vend, disa reporterë janë dhunuar, të tjerë janë kërcënuar egërsisht dhe ka edhe të dhunuar deri në përgjakje nga elementë ekstremistë.
Këto burime bëjnë me dije se Policia e Shtetit e Maqedonisë ka dëshmuar indiferencë dhe ikje nga roli ligjor i saj duke e lënë dhunën të përshkallëzohet dhe si rezultat jeta e disa gazetarëve është në rrezik serioz.
Unioni i Gazetarëve Shqiptarë bën thirrje të ndalen këto akte menjëherë, të garantohet jeta dhe liria e raportimit për gazetarët dhe autorët e dhunës mbi gazetarët të vihen menjëherë para ndëshkimeve ligjore.
U bëjmë thirrje autoriteteve institucionale maqedonase të dëshmojnë përgjegjësinë maksimale në mbrojtjen e gazetarëve dhe sidomos atyre me kombësi shqiptare, pasi në këtë mënyrë garantohet paqja dhe demokracia në një vend që pretendon të bëhet anëtar i BE-së dhe të pretendojë të qenin një shtet ligjor.
Zyra e shtypit Unioni i Gazetarëve Shqiptarë
