Asambleja e Përgjithshme të mërkurën vendosi që drejtimi i Federatës Shqiptare të Futbollit ta drejtojë edhe për katër vitet e ardhshme Armand Duka. Menjëherë pasi u rizgjodh për të pestën herë në krye të FSHF-së ai është telefonuar nga krerët e FIFA-s dhe UEFA-s.
Fillimisht Presidenti i UEFA-s, Aleksandër Ceferin gjatë një bisede telefonike fare pak orë pas mbylljes së punimeve i përcolli urimet e menjëhershme z. Duka për vazhdimësinë e tij në këtë detyrë si dhe për bashkëpunimin e mëtejshëm mes UEFA-s dhe FSHF në projektet e përbashkëta. Presidenti i UEFA-s gjithashtu ka shprehur përgëzimet e tij për mbarëvajtjen normale të punimeve teksa ka rikonfirmuar edhe angazhimin e tij për një bashkëpunim akoma më të ngushtë në vijim.
Po kështu edhe Presidenti i FIFA-s, Gianni Infantino zhvilloi një bisedë telefonike urimi me Presidentin Duka për votëbesimin që i dha sërish asambleja. Edhe kreu i FIFA-s përgëzoi Duka për mbarëvajtjen e procesit zgjedhor të Asamblesë dhe njëherësh rikonfirmoi thellimin e mëtejshëm të bashkëpunimit mes dy institucioneve.
