Edhe pse e kritikuar shpesh, hakmarrja zgjon tek njeriu një forcë të jashtëzakonshme. I tillë ishte edhe rasti i 11-vjeçarit afgan, Uasil Ahmed. Ai ishte 8 vjeç, kur talebanët i vranë të atin, një punonjës i forcave afgane të sigurisë. Pasi insistoi disa herë, xhaxhai i mësoi përdorimin e të gjitha armëve.
Në gushtin e vitit 2015, ai u rrethua në banesë së bashku me familjen e tij dhe një njësi policore, nga mbi 500 talebanë. Pas plagosjes së xhaxhait, Uasil mori drejtimin e grupit prej 26 burrash, dhe për 3 javë bëri një rezistencë epike ndaj sulmeve të njëpasnjëshme. Ai qëlloi deri në 120 herë me mortajë kundër talebanëve, dhe vrau me kallashnikov të paktën 6 prej tyre. Në fund, ata arritën të evakuohen nga një helikopter i ushtrisë afgane.
Uasil u zhvendos me familje në qytetin Tirin Kot. Në fillim të shkurtit 2016, Uasil kishte dalë në tregun e fruta-perimeve me 2 kushërinjtë e tij. Ndërsa po bisedonte me një shitës, dy burra hipur mbi një motoçikletë ndaluan nga pas. Njëri prej tyre, e qëlloi dy herë me pistoletë. Heroi 11-vjeçari, vdiq rrugës për në spital.
