As sot nuk ka marrë zgjidhje radha kilometrike në Kakavijë, që vijon prej tre ditësh. Ndonëse u duk se diçka do të lehtësohej, pasi nga pala greke ishte thënë se puna do të vazhdonte gjithë natën, në të vërtetë asgjë nuk është bërë.
Qytetarëve që janë në radhë, u është thënë se natën nuk do të punohet, por puna do të rifillojë nesër në orën 07:00 të mëngjesit.
Raportohet se Forcat e Armatosura kanë nisur shpërndarjen e ushqimeve për qytetarët që janë bllokuar në radhët e gjata.
Në një lidhje telefonike për ‘Report Tv’, Ministrja e Mbrojtjes, Olta Xhaçka tha se ajo vetë, por edhe Ministria e Jashtme dhe ajo e Shëndetësisë kanë komunikuar me homologët e tyre grek, në mënyrë që të lehtësohet sa më shpejt të jetë e mundur situata.
“Është krijuar një radhë kilometrike e atyre qytetarëve që duan të udhëtojnë drejt Greqisë. Kjo situatë është diktuar edhe nga disa rregulla dhe kufizimet e reja të vendosura nga data 17 gusht dhe kjo shpjegon ngutjen për të udhëtuar me këtë fluks gjatë këtyre ditëve.
Duhet sqaruar se vendimet e qeverisë greke janë marrë për të gjitha dhe jo vetëm për vendet jashtë BE. Kemi komunikuar me palën greke, dhe unë kam pasur komunikim me homologun tim dhe e njëjta gjë edhe me Ministrinë e Shëndetësisë dhe atë të Jashtme kanë komunikuar me homologët e tyre grek, për të lehtësuar situatën.
Kjo nuk do të thotë heqjen e rregullave të vendosura për të gjithë, por do të thotë rritje të kapaciteteve testuese në kufi, dhe për këtë po punon pala greke pasi është dhe arsyeja që ka shkaktuar radhë. Pala greke po bënë maksimumin për të rritur ekipet mjekësore dhe zgjatja e orarit përtej orës 22:00 që do e çonte në shfryrjen e situatës që na takon. Po bëjmë maksimumin për të plotësuar nevojat bazike dhe të sigurisë, krijimin e masave higjieno-sanitare të domosdoshme për kohën kur po kalojmë”, tha Xhaçka.
E pyetur se pse autoritetet reaguan vetëm pas tri ditësh, kur mediat e ngritën këtë shqetësim të qytetarëve, Xhaçka u shpreh se kjo situatë nuk është e krijuar nga qeveria por nga vetë udhëtarët që janë ngutur në udhëtim për të shmangur kufizimet e reja.
Ministrja Xhaçka gjithashtu i bëri thirrje qytetarëve se kush nuk e ka me ngut udhëtimin në Greqi, të kthehet për të shmangur krijimin e radhëve të gjata dhe të kontribuojë në lehtësimin e situatës.
