Prokuroria e Krimeve të Rënda ka kërkuar pezullim nga detyra për tre gjyqtarët e Gjykatës së Apelit të Durrësit.
Megjithatë, Apeli i Krimeve të Rënda ka rrëzuar kërkesën e Prokurorisë për pezullimin nga detyra të Kliton Spahiu, Petrit Çeno dhe Petraq Dhimitri.
Këta të fundit akuzohen se kanë pasur në dorë çështjen e një biznesmeni, i cili u sponsorizoi rrugën jashtë dhe biletat për ndeshjen Real Madrid-Barcelona.
Akuza
Tre gjyqtarët e gjykatës së Apelit Durrës u vunë në hetim pasi dyshohet se një biznesmen durrsak, që ishte palë në një proces civil që po shqyrtohej prej tyre, u ka paguar atyre shpenzimet për dy udhëtime jashtë vendit.
Në kohën e nisjes së hetimit, BIRN bëri me dije se tre gjyqtarët kanë ndërmarrë një udhëtim në Spanjë në tetor 2014, për të parë ndeshjen e futbollit Real Madrid–Barcelona.
Në kohën e udhëtimit drejt Madridit, Sadiku kishte të hapur një çështje gjyqësore në Gjykatën e Apelit Durrës. Më herët, tre gjyqtarët kishin udhëtuar në shoqërinë e Sadikut edhe në Itali.
Konflikti gjyqësor lidhet me ndërtimin e hotelit 10 katësh të Sadikut në plazhin e Durrësit, në zonën e Shkëmbit të Kavajës. Sadiku ishte paditur nga ish-ortaku i tij në ndërtimin e kompleksit, Oliver Ushina, prej shkurtit të vitit 2012.
Në Gjykatën e Shkallës së Parë Durrës, çështja në fjalë është fituar nga paditësi Oliver Ushina. Ndërkohë, Gjykata e Apelit e ka rrëzuar vendimin e Shkallës së Parë duke i dhënë të drejtë Sadikut.
Pas vendimit të Gjykatës së Apelit, më 18 shkurt 2015, Ushina ka paraqitur një kallëzim penal në Prokurorinë e Durrësit, ku akuzonte treshen e gjyqtarëve se kishin marrë vendim në favor të Sadikut, pasi kishin përfituar prej tij dy udhëtime jashtë vendit.
Zyra e shtypit e Prokurorit të Përgjithshëm konfirmoi procedimin penal në adresë të gjyqtarëve, ndërsa pohoi se çështja është ende në hetim.
