Prokurorët brazilianë kanë vendosur në bankën e të akuzuarve 16 persona, duke përfshirë dhe pronarin e një prej kompanive gjigante të minierave, nën akuzën e vrasjes dhe krimeve mjedisore. Ata akuzohen si përgjegjës për shembjen e digës vitin e kaluar ku humbën jetën 270 persona.
Këto akuza u bënë të ditura nga prokurorët në Mias Gerais vetëm disa ditë para përvjetorit të parë të fatkeqësisë së rëndë.
Në listën e të akuzuarve janë punëtorë të kompanisë dhe ish-drejtori i kompanisë Vale, Fabio Schvartsman. Sakaq, në bankën e të akuzuarve janë dhe pesë inxhinierë të lartë të kompanisë gjermane, TÜV SÜD.
Prokurorët besojnë se mes këtyre kompanive ka pasur konflikt të interesit, sepse kompania braziliane ka fshehur të dhënat për mungesën e qëndrueshmërisë së digës për të mos dëmtuar reputacionin e saj. Ndërsa kompania gjermane ka lëshuar raporte duke thënë se diga është e sigurt.
Prokurori William Garcia akuzoi ish-shefin e kompanisë Vale se ka vepruar drejtpërdrejtë për të krijuar përshtypjen e rreme se digat e kësaj kompanie janë plotësisht të sigurta.
