Deputetja demokrate Rudina Hajdari, ka reaguar ndaj të gjithë zërave që u përhapën në kohë reale, se ajo është refuzuar nga studentët në protestë. Në një postim në mediat sociale, Hajdari shkruan se nuk është refuzuar nga studentët, por do t’u bashkohet vetëm nëse ata e mirëpresin.
Vajza e dëshmorit të demokracisë, Azem Hajdari, ka thënë më herët se do t’i bashkohet protestës së studentëve dhe do të zhvishet nga çdo funksion politik, për të çuar në fund amanetin e babait të saj.
Fjala e plotë
“Të dashur vëllezër dhe motra. Unë nuk kisha parashikuar të flisja sot, por kam kënaqësinë të flas para jush, dhe sot dua t’i bëj një betim tim ati, t’iu bëj një betim të rinjve se jam gati të lë mandatin tim për t’iu bashkuar të rinjve sot, për luftën e tyre.
Nuk jam kthyer në Shqipëri për një post, për të qenë një deputete. Por jam kthyer për të ardhmen e Shqipërisë, për vëllezërit e mi, për vajzën time, për të çuar amanetin e babait tim deri në fund.
Prandaj, sheshi i demokracisë sot nuk është këtu, është tek Ministria e Arsimit, dhe ne sot duhet të shkojmë t’i bashkohemi studentëve.
Falenderoj ish-studentët e dhjetorit, si dhe çdo njeri që luftoi për demokracinë. Por sot ka ardhur koha për një demokraci tjetër, për një demokraci që nuk zhvat dhe largon të rinjtë jashtë Shqipërisë.
Ne e kemi vendin këtu, dhe ne këtu do të luftojmë dhe ta bëjmë këtë vend si gjithë Evropa.
Njerëzit kanë humbur shpresën, dhe njerëzit janë varfëruar.
Njerëzit kanë humbur shpresën tek politikanët, kanë humbur shpresën tek çdo njeri.
Ata e bënë detyrën e tyre, tani duhet ta bëjmë ne.
Të çohemi sot dhe t’i themi kësaj kaste politike që ka korruptuar vendin, që demokracia është e jona, vendi është i yni.
Ne nuk do të largohemi nga këtu. Unë kurrë nuk do të largohem nga Shqipëria”.
