Rama e ka cilësuar “thashethem” emrin e drejtoreshës së kabinetit të kryemistrit, Vali Bizhga si emrin e tij të preferuar për t’u propozuar si kandidate për Presidente. Vali Bizhga është emri që sipas ish-kryeministrit Sali Berisha, është përfolur si një nga emrat që kreu i qeverisë Edi Rama do të vendosë në postin e Presidentit. Por kreu i qeverisë ka vendosur pikat mbi “i”, duke thënë se nuk ka asgjë të vërtetë në këtë lajm.
“Nëse do të bënim javë kulturore për thashethemet, Shqipëria do të mbante flamurin e kryesuesit të aftësisë prodhuese. Por do të doja të mos e shfokusonim vëmendjen dhe na duhet mbështetja e të gjithëve ju, dhe derisa të gjithë të mësojnë përmbajtjen e saj dhe pastaj me gjasë të interesohen dhe të zgjedhin dhe të përfshihen si vizitorë në të gjitha këto seri javësh që fillojnë sot dhe përfundojnë në fund të vitit me një ndërprerje në mes të pushimeve verore. Nuk do të doja të shfokusoheshim dhe procesi i zgjedhjes së Presidentin përfshin maksimalisht thashethemet dhe përfshihen emra pa dëshirën e tyre siç është rasti në fjalë. Përgjigjja ime është negative, sepse nuk ka asnjë të vërtetë në këtë”, tha Rama.
Kush është Vali Bizhga
Ajo mori postin e drejtoreshës së kabinetit të Këshillit të Ministrave në vitin 2013. Vali Bizhga u prezantua nga kreu i qeverisë Edi Rama si një prej bashkëpunëtorëve të tij të ngushtë që në kohën kur ai mbante postin e kryebashkiakut të Tiranës.
“Është kënaqësi dhe nder t’ju prezantoj drejtoren e kabinetit tim në Kryeministri, Vali Bizhgën. Me Valin kemi punuar krah për krah për shumë vite në Bashkinë e Tiranës, ku kam pasur privilegjin ta kem zëvendësen time dhe më pas drejtore të kabinetit të kryetarit të Bashkisë. Por kemi ndarë së bashku edhe përpjekjet dhe emocionet e disa fushatave, ku Vali ka luajtur prapa kuintave rolin kyç të drejtorit ekzekutiv të fushatës.
Një betejë më e rëndësishme për të, ajo me një kancer të shfaqur befas në formë agresive, e shkëputi lidhjen tonë të punës, për aq sa kohë iu desh Valit ta fitonte betejën më të vështirë të jetës së vet.
Tashmë, ajo është rikthyer në fushën e kahershme të përpjekjes sonë të përbashkët për të bërë punë të mira për vendin e njerëzit, e do të mbulojë me profesionalizmin, pastërtinë dhe përkushtimin e saj të posaçëm në komunikimin me njerëzit, një detyrë ku pa asnjë dyshim do vendosë një standard të ri”, shkruante Rama.
