Ish-deputeti i Partisë Demokratike, Bardh Spahia ka sqaruar përplasjen që pati mbrëmjen e djeshme me ministrin e Brendshëm, Sandër Lleshaj, gjatë kohës që ky i fundit po vizitonte efektivët që mbetën të plagosur në protestë.
I ftuar në “News24”, Bardhi tha se ka qenë i pari që ka shkuar në spital për t’u interesuar mbi gjendjen shëndetësore e një të riu nga qyteti i Fierit. Spahia deklaroi se u revoltua kur vuri re shtimin e numrit të policëve dhe civilëve në spital, ndërsa e cilësoi prezencën e ministrit “show”.
“I plagosuri kishte hemorragji të madhe dhe me porosi të kryetarit Basha shkova t’i qëndroj pranë. Po komunikoja me kolegët e mi mjekë dhe aty mora vesh që kishte 4 të plagosur në total. I vizitova edhe ata, kishin dëmtime serioze. U interesova edhe për 7 policët, nuk kishin nevojë për mjekim, ishin thjesht në regjim shtrati. Njëri kishte një hematomë të vogël në vetull, tjetri në pulpë, edhe ajo pa probleme. Në një moment vërshuan forca të shumta policie u mbush spitali me civilë e policë, pas tyre hyri ministri i shoqëruar me ekipin e tij me kamera në dorë. Donte të bënte një show të neveritshëm.
“Më thanë vetë policët që s’mund të largoheshin nga spitali deri sa të vinte ministri të bënte show bashkë me drejtorin e përgjithshëm të Policisë. Aq e vërtetë është kjo sa pasi iku ministri, ikën edhe shumica e policëve”, tha ish-deputeti.
