Deputeti Arben Imami ka reaguar pas “masakrimeve” që vijuan si pasojë e deklaratës së tij të fortë, të bërë mbrëmë në emisionin “Opinion”.
Imami tha se Basha la jashtë Topallin dhe “futi në parlament gra shtëpiake që kanë pjellë 3-4 fëmijë”. Sot, deputeti ka reaguar në përpjekje për të sqaruar kontekstin e deklaratës së tij, pas reagimeve të ashpra.
Teksa thotë se lindja e njeriut është ngjarja më e madhe botërore, Imami nuk përmend asnjëherë foljen “pjell” që bëri bujë mbrëmë, ndërsa shtoi ka qenë një “krahasim midis meritës publike të znj. Topalli (e cila gjithashtu ka lindur fëmijë, por kjo nuk është arsyeja e meritës së saj publike) dhe mungesës së plotë të deritanishme të jetës publike të zonjës kandidate.”
DEKLARATA E IMAMIT:
Lindja e njeriut është ngjarja më e madhe botërore. Gruaja ka detyrimin dhe fatin e madh të amësisë, por ky është një fakt natyror, dhe i përket sferës private, familjare.
Kjo nuk do të thotë se ajo është e privuar nga jeta publike – vetëm një marksiste feministe fondamentaliste si Shulamith Firestone thotë se ajo duhet ta ndryshojë këtë kusht natyror për t’u përfshirë në jetën publike.
Krahasimi im ka qenë midis meritës publike të znj. Topalli (e cila gjithashtu ka lindur fëmijë, por kjo nuk është arsyeja e meritës së saj publike) dhe mungesës së plotë të deritanishme të jetës publike të zonjës kandidate.
Shpresoj të kemi davaritur nëse ka pasur ndonjë paqartësi dhe jo aktivizëm politik në vërejtjet e bëra.
Dashamirësisht, Arben Imami!
