Prokuroria për Krime të Rënda ka marrë në pyetje deputetin socialist Ilir Ndraxhi, për llogari të hetimeve të dosjes 339. Deputeti socialist, Ilir Ndraxhi, emri i të cilit lakohet në përgjimet e publikuara nga tabloidi gjerman “Bild” nga ish i dënuari për vrasje Astrit Avdylaj, është marrë në pyetje dy ditë më parë. Burimet bëjnë me dije se ai është paraqitur në institucionin e akuzës të enjten, dhe ka qëndruar përballë prokurorëve për afro dy orë, duke dhënë shpjegimet e tij për çështjen.
Në përgjimet e Prokurorisë që u publikuan nga “Bild”, dëgjohet Astrit Avdylaj teksa flet me Arjan Ndraxhin, vëllain e ligjvënësit socialist, të cilin e informon se Iliri do të jetë në listën e kandidatëve për deputetë në zgjedhjet parlamentare të qershorit 2017.
Biseda ngriti dyshime të forta se është pikërisht Astrit Avdylaj, njeriu që ka ndikuar që Ndraxhi të jetë pjesë e listës, edhe pse deputeti ka mohuar çdo lidhje me anëtarët e grupit kriminal.
Referuar përgjimeve, ka dyshime të forta se Astrit Avdylaj, siguronte vota për llogari të Partisë Socialiste, ç’ka mund të ketë sjellë për pasojë edhe deformimin e rezultatit të zgjedhjeve parlamentare të 2017.
