Ish-deputetja e Partisë Demokratike, Majlinda Bregu ka folur sot për lënien jashtë parlamentit nga mbyllja e shkollës evropiane verore.
Bregu tha se kjo ndodhi për shkak se pagoi çmimin e respektit ndaj vetes, ndërsa shtoi se do të vijojë të japë kontributin e saj për integrimin e vendit në Bashkimin Evropian.
“Nga marsi i vitit 2007 deri në shtator 2013 m’u besua detyra e lartë për nxitjen dhe koordinimin e përpjekjeve për afrimin e Shqipërisë dhe Europës. Investova në të çdo ditë të kalendarit. Nuk dështova, gjithçka u bë sigurisht edhe falë të tjerëve që iu detyroj mirënjohjen time të sinqertë. Nuk u ndjeva asnjëherë vetëm, dola nga kjo eksperiencë më e ditur, më e matur.
U mundova të kuptoja dhe pastaj të flisja se çfarë nuk shkon me stilin që brezi im po bënte politikë. Nuk jemi edukuar për të qenë të lirë dhe për ta respektuar lirinë. Se ç’ndodhi në vijim e dinë të gjithë pagova çmimin e respektit ndaj vetes se thashë disa të vërteta që vazhdojnë të mbeten edhe sot të vërteta. Disa janë mësuar që veten ta kërkojnë ndër të tjerët dhe këta janë e keqja që s’munden dot kollaj, banaliteti dhe e keqja më e madhe sot e Shqipërisë”, tha Bregu.
Gjithashtu, ish-ministrja Bregu hodhi poshtë thashethemet për përfshirjen e saj në qeverinë Rama 2:
“Për një përfolje publike për përfshirjen time në qeverinë e sotme, jam lodhur duke përgënjeshtruar lajme dhe sajesa. Mua s’më duhet të jem në parlament e qeveri për të qenë shqiptare, të përpiqem po njëlloj për të afruar datën e anëtarësimit të Shqipërisë në Evropë mbase 1 mijë herë më shumë se dhe ministrat aktualë”.