I shumëkërkuari Arbër Çekaj është arrestuar në Gjermani ditën e sotme. I shumëkërkuari i drejtësisë shqiptare është prangosur pas bashkëpunimit midis policisë shqiptare dhe asaj gjermane. Ai u shpall në kërkim pas kapjes së 613 kilogram kokainë në kontejnerin e bananeve në qendrën Arbri Garden në pronësi të vetë Çekajt.
Njoftimi i policisë: Ne kuader te bashkepunimit me agjensite e huaja ligjzbatuese dhe konkretisht ate Gjermane eshte bere e mundur lokalizimi dhe arrestimi i shtetasit Arber Çekaj. Arber çekaj eshte pronari i firmes Arbi Garden ku u sekuestruan 613 kg kokaine ne kiader te operacionit “last snow”. U shkembye informacion ne kohe rekord midis Policise se Shtetit dhe agjensive te tjera si dhe me Prok Krimeve te Renda. Ky shtetas eshte kapur ne nje province prane Dysedorfit.
Ndërkaq më herët, Gjykata e Krimeve të Rënda miratoi kërkesën e Prokurorisë së Krimeve të Rënda për të dhënë masën e sigurisë “arrest me burg në mungesë” për Arbër Çekajn, pronarin e kompanisë që solli kontejnerin me 613 kilogramë kokainë nga Kolumbia.
Vendimi i gjykatës u dha në mungesë të të akuzuarit, i cili u largua nga Shqipëria për në Gjermani tre ditë para se të kapej sasia e drogës në kamionin me banane.
Në kontejnerin e porositur nga kompania “Arbri Garden” u gjetën 613 kg kokainë, e fshehur në dyshemenë e dyfishtë të kamionit, vlera e së cilës shkonte deri në 180 milionë euro. Sekuestrimi i saj u bë mbrëmjen e 27 shkurtit, ku u arrestua shoferi i kamionit Armando Pezaku dhe menaxheri i kompanisë Donald Lushaj. Kjo ishte sasia më e madhe e kokainës e kapur ndonjëherë në Shqipëri dhe itinerari i sasisë së ardhur ishte Kolumbi-Maltë-Itali.
