Pas publikimi të lajmit se po kërkohet ndjekje penale ndaj ish-gjyqtarit të Gjykatës Kushtetuese, Besnik Imeraj ka reaguar ky i fundit.
Imeraj tha se është një sulm politik ndërsa shtoi se nuk ka asnjë bazë kushtetuese dhe ligjore.
Mdërkohë, Komisioni i Pavarur i Kualifikimit ka referuar pranë Zyrës së Prokurores së Përgjithshme të gjithë dokumentacionin që rezultoi nga hetimi administrativ gjatë procesit të rivlerësimit të ish-gjyqtarit të Gjykatës Kushtetuese, Besnik Imeraj.
I kontaktuar nga Ora News, Besnik Imeraj deklaroi se është në rregull dhe nuk ka asnjë problem me ligjin dhe Kushtetutën.
“Kjo që po ndodh nuk ka asnjë bazë kushtetuese dhe ligjore.
Që kur Edi Rama dhe qeveria bëjnë kontrollin e gjyqtarëve, çdo gjë është e qartë.
Unë jam në rregull dhe nuk kam asnjë problem me ligjin dhe Kushtetutën.
Kjo e gjitha është e motivuar politikisht”, u shpreh Besnik Imeraj.
Imeraj u dekretua si anëtar i Gjykatës Kushtetuese nga presidenti i asaj kohe Bujar Nishani me dekret Nr. Dekretit 8066, datë 22 Mars 2013.
Imeraj ishte ndër të parët në listën e anëtarëve të Gjykatës Kushtetuese që do të thirrej nga organet e vettingut, ndërsa më herët kishte nisur verifikimi i gjithë anëtarëve të trupës së Gjykatës Kushtetuese.
Ndërkohë Imeraj dha dorëheqjen me 31 janar duke e argumentuar motivin me arsye personale.
