Hasan Mira, i infektuar me koronavirus, u hodh dje nga kati i katërt i Sanatoriumit. Ai ishte në gjendje të rëndë shëndetësore, por jo në gradën e intubimit. 65-vjeçari ishte shtruar një ditë më parë në spitalin “Shefqet Ndroqi”, me pneumoni të shkaktuar si pasojë e virusit SARS COV2, dhe po trajtohej me terapinë e plotë të mjekimit.
Një mjeke e spitalit “Shefqet Ndroqi” ka reaguar për rastin e hedhjes së 65-vjeçarit të shtruar në këtë spital.
“Jemi këtu dhe po bëjmë këtë punë të jashtëzakonshme për të shpëtuar jetën nga sëmundja e rrezikshme dhe e pabesë që ka prekur gjithë botën. I shprehim ngushëllimet e sinqerta familjes së 65-vjeçarit. Ai ishte i shtruar me pneumoni si pasojë e SARS COVID 2 dhe po trajtohej nga ne si dhe kishte shqetësime psikologjike. Sigurojmë qytetarët se do shërbejmë me përkushtim e sakrificë për të gjithë pacientët”, tha mjekja.
