Festim Lato, president i vetëshpallur i Republikës së Çamërisë, i cili u ekzekutua ditën e sotme në prag të shtëpisë së tij, prej 25 vitesh jetonte në Holandë.
I lindur në qytetin e Vlorës, Lato, njihej si biznesmen, por edhe si një ndër aktivistët më në zë për çështjen çame. Republikën e Çamërisë, e shpalli më 30 tetor të vitit 2016, ndërsa kishte premtuar në vitin 2017 se shumë shpejt do të prodhoheshin edhe 500 pasaportat e para të Çamërisë.
“Në një kohë të shkurtër, sipas informacioneve që unë kam nga burime të ndryshme, di që kufijtë do të ndryshojnë, por në favor të shqiptarëve. Asnjë pëllëmbë tokë shqiptare nuk do të kalojnë në dorë të grekëve, maqedonëve apo malazezëve. Të gjitha këto troje do të mblidhen dhe do të bashkohen në një qendër, në atë që quhet Shqipëria Natyrale”, ka thënë Festim Lato pak vite më parë.
Mediat greke e kanë konsideruar Festim Laton një person të rrezikshëm për Greqinë, pasi, sipas tyre, ky individ ka kërcënuar shtetin helen se do ti shpërbëjë.
Në politiken greke, Festim Lato njihet si nje kripto Hebre, i cili është i lidhur ngushtë me Zionistët. Ndërsa politika shqiptare ka mbajtur thuajse qëndrim pasiv kundrejt Festim Latos dhe shpesh herë bllokues, ku ai i ka bërë thirrje popullit që t’i besojnë atij për një projekt që ai ka paraqitur për të krijuar një Shqipëri ku çdokush do ta kishte ëndërr të jetonte, duke përfshirë edhe territorin e Çamerisë.
Gjithashtu, në vitin 2005 kishte shpallur edhe Ushtrinë Çlirimtare të Çamërisë, e cila në qytetin e Janinës, asokohe i kishte shpërndarë disa fletushka për çlirimin e Çamërisë nga Greqia.
Motivet e vrasjes së Latos nuk janë zbuluar ende, teksa miqtë e tij kanë shkruar në rrjetet sociale se ai është ekzekutuar nga shërbimet sekrete greke.
