Dy specialistët-psikologë të burgut të Reçit, Arnaldo Hoxha dhe Mario Laloshi të cilët akuzoheshin për korrupsion, janë lënë në burg. Hoxha dhe Laloshi akuzohen për korrupsion, pasi në këmbim të raportit pozitiv me qëllim përfitimin nga sjellja e mirë, janë filmuar duke marrë rryshfet.
Të dy specialistët u denoncuan në emisionin “Stop”, pasi bashkëshortja e Martin Tushes, i cili vuan dënimin në Reç, pretendon se punonjësit i kanë kërkuar para në këmbim të disa shërbimeve.
Mario Laloshi është përgjegjës për kontaktet e të burgosurve me familjarët, ndërsa Arlando Hoxha ndikon në raport-vlerësimin e sjelljes së të burgosurve, kur kërkohet që koha e mbetur e vuajtjes së dënimit, t’i konvertohet në arrest shtëpie apo shërbim prove. Sipas bashkëshortes, Martinit i takojnë të gjitha këto vlerësime lehtësuese, mirëpo bëhen enkas të vështira, për të zhvatur para.
