Policia e Lezhës ka vënë në pranga Drejtorin e Ujësjellësit të Kurbinit, Alfred Prodani. Ky i fundit është arrestuar për llogari të Interpolit, pasi dyshohet se ka kryer vjedhje në Spanjë. 41 vjeçari është arrestuar nga policia e Kurbinit në bashkëpunim me Interpol Tirana, me qëllim ekstradimin e tij drejt Spanjës.
Prodani ishte i shpallur në kërkim, pasi Gjykata Coruna/Spanjë, në vitin 2013, ka lëshuar urdhër arresti-ndërkombëtar, për veprën penale “Vjedhja me dhunë”. Prodani ishte akuzuar në vitin 2019 edhe nga ish-kryeministri Berisha për vjedhje, akuza të cilat i ka mohuar. Sipas Berishës, i cili i referohej qytetarit dixhital, Prodani së bashku me Edmond Jushi, drejtor i Mirëmbajtjes së Rrugëve Rural kishin vjedhur shtëpinë e yllit të Real Madrid, Karim Benzema.
“Në kuadër të operacionit policor të koduar “Coruna”, forcat policore të Komisariatit të Policisë Kurbin, në bashkëpunim me Interpol Tirana, kapën dhe arrestuan në qytetin e Laçit, me qëllim ekstradimi drejt Spanjës, shtetasin A. P., 41 vjeç, banues në Kurbin.
Ky shtetas, ishte shpallur në kërkim ndërkombëtar, pasi Gjykata Coruna/Spanjë, në vitin 2013, ka lëshuar urdhër arresti ndërkombëtar, për veprën penale “Vjedhja me dhunë”, parashikuar nga Kodi Penal i Spanjës”, thuhet në njoftimin e policisë.
