GJKKO ka rrëzuar kërkesën e ish-drejtoreshës së Agjencisë së Blerjeve të Përqendruara, Edlira Naqellari, për t’i kthyer telefonin celular.
Duke iu referuar Gjykatës së Posaçme kundër Korrupsionit dhe Krimit të Organizuar (GJKKO) në telefon mund të ketë prova të vlefshme për hetimin, dhe Prokuroria ka të drejtë ta ekzaminojë.
Naqellari u arrestua së bashku me 7 ish-zyrtarë dhe zyrtarë të Ministrisë së Brendshme, pasi dyshohet se kanë shpërdoruar detyrën për tenderin 2.8 mld lekë të uniformave të Policisë së Shtetit.
SPAK ka deklaruar në gjykatë se ky hetim është ende i hapur, dhe telefoni Naqellarit i nevojitet për të zbardhur çdo bisedë e komunikim në lidhje me tenderin.
9 zyrtarë të Ministrisë së Brendshme akuzohen nga SPAK për shkelje te barazisë në tender, pasi ka dyshime për shkelje të rënda në tenderin prej 2.8 miliardë lekë.
Gjykata e Posaçme kundër Krimit të Organizuar dhe Korrupsionit, pranoi kërkesën e SPAK më 12 korrik, duke lënë tetë prej tyre në burg dhe një në “arrest shtëpie”.
Ish-drejtoresha e Agjencisë së Blerjeve të Përqendruara, Edlira Naqellari, së bashku me zyrtarë dhe ish-zyrtarë të Ministrisë së Brendshme janë lënë pas hekurave, ndërsa e vetmja që do të vijojë që të hetohet jashtë qelisë, pra “arrest shtëpie” është Anisa Bogdani me argumentin se duhet të kujdeset për fëmijën e mitur.
Në dosjen e SPAK theksohet se Edlira Naqellari ishte në dijeni të problematikave të konstatuara, por megjithatë e ka çuar deri në fund realizimin e këtij prokurimi abuziv. Ish –drejtoresha e Agjencisë së Blerjeve të Përqendruara Edlira Naqellari, në dëshminë e saj këmbënguli se është e pafajshme, ndërsa shtoi se ende nuk e ka të qartë se cilin ligj ka shkelur.
