Elisa Spiropali foli dje për shkarkimin e 11 krerëve të degëve të PS. Këto shkarkime ishin si pasojë e vonesave në riorganizimin e partisë, në fushatën e anëtarësimeve dhe në degët lokale. Ajo që në media u bë fakt i kryer, ishte thjeshtë një lapsus i Spiropalit. Menjëherë pas qëndrimit të saj, nga selia rozë u qartësua se gjatë mbledhjes së kryesisë nuk ishte marrë vendimi i shkarkimit.
Gjatë kësaj mbledhje ishte diskutuar propozimi për shkarkimin e 11 kryetarëve të PS-së në nivel bashkie. Madje, nga zyra e shtypit u bë e ditur se tashmë ky propozim do të diskutohet me drejtuesit politikë të qarqeve, si dhe asambletë e rretheve. Kjo për të vendosur më pas nëse do të vendoset për shkarkimin e tyre, ose jo.
Raportohet se ka qenë vetë kryeministri Rama, ai që është ankuar për neglizhencën e socialistëve. Arsyet e këtij propozimi drastik lidhen me punën e dobët të bërë prej tyre në drejtimin e partisë, raporton “Gazeta Shqiptare”.
Emrat
Në listën e krerëve të PS-së në nivel bashkie që kanë punuar keq, bie në sy se bëhet fjalë për degë partie që në pushtetin vendor drejtohen kryesisht nga PD ose LSI, ku duket se edhe PS ndihet më e dobët.
Listën e kryeson kryetari i PS-së së Shkodrës, Arvit Osja. Për të vijuar me kryetarin e PS-së në Tropojë, Abedin Katana. Kryetarin e PS-së Përmet, Edvin Tuci; atij të Devollit Erold Begolli, atij të Selenicës, Nertil Ballaj. Apo dhe ai i Cërrikut, Gëzim Salla.
Të gjitha këto bashki, që në pushtetin vendor drejtohen nga përfaqësues të PD dhe LSI. Pjesë e listës së kryetarëve që kanë punuar keq janë edhe kryetarët e PS-së në Dibër, Kurbin, Memaliaj, Shijak dhe Ura Vajgurore. Verdikti për fatin e këtyre drejtuesve socialistë është në dorë të drejtuesve politikë të qarkut, të cilët do duhet të bëjnë edhe një analizë më të thelluar për të nxjerrë shkaqet e këtyre rezultateve.
‘Statuti’, Neni 31 – Kryetari i partisë së bashkisë
Mandati i kryetarit të partisë së bashkisë si rregull është 4 vjet. Mandati i tij ndërpritet para kohe kur:
Jep dorëheqjen
Shkarkohet nga kryesia e partisë për dobësi në punë e shkelje të normave të statutit.
Nuk fiton në mocion votëbesimi të zhvilluar për të.
Humbet besimin e anëtarësisë dhe të organizatave socialiste të bashkisë dhe shkarkohet prej tyre.
Humbet zgjedhjet vendore, ose arrin rezultat më të dobët se zgjedhjet e mëparshme politike në bashkinë respektive.
Në rastet e mësipërme, mandati ndërpritet automatikisht dhe kryetari qëndron në detyrë deri në zgjedhjen e kryetarit
të ri.
Kryetarët e PS që janë propozuar për t’u shkarkuar:
Arvit Osja – Shkodër
2. Gëzim Salla – Cërrik
3. Afrim Mikli – Dibër
4. Agron Ivani – Kurbin
5. Edvin Tuci – Përmet
6. Nertil Bellaj – Selenicë
7. Erold Begolli – Devoll
8. Edmonda Harizaj – Memaliaj
9. Abedin Katana – Tropojë
10. Elton Arbana – Shijak
11. Arjan Çepele – Ura Vajgurore
