Spitali i Durrësit është përfshirë nga flakët në orët e para të mëngjesit të sotëm. Mësohet se zjarri ka rënë vetëm pak mesnate, në fillim në sektorin e kirurgjisë në katin e parë dhe më pas është përhapur dhe në katet e tjera.
Nga djegia e kabllove sallat janë mbushur me tym duke shkaktuar panik te personeli dhe të shtruarit. Punonjësit e spitalit janë vënë menjëherë në lëvizje duke larguar pacientët, pasi rrezikohej jeta e tyre qoftë nga flakët, qoftë nga tymi.
Menjëherë në vendngjarje ka mbërritur policia dhe forcat zjarrfikëse. Mësohet se shkak për zjarrin është bërë një shkëndijë elektrike.
Sipas Drejtoreshës së spitalit, Nadire Jani, zjarri ka përfshirë kabinën kryesore të energjisë elektrike. Pastaj është shpërndarë nëpër rrjetin e katit të parë dhe më pas ka djegur të gjithë rrjetin elektrik deri në katin e katërt, duke lënë pjesën më të madhe të spitalit pa energji.
Drejtoresha tregon se 5 pacientë janë transportuar për në spitalin e Tiranës, pasi kishin nevojë për oksigjenim.
“Zjarri përfshiu kabinën kryesore të energjisë elektrike dhe rrjetin elektrik në gjysmën e spitalit nga kati i parë në të katërt, duke bërë që gjysma e spitalit të mbetej pa energji. Të gjithë pacientët e neurologjisë, kirurgjisë, janë zhvendosur. Ndërsa 5 qe kërkonin oksigjenim janë dërguar në Tiranë”, tha ajo.
