Turqia po përjeton ditët e saj më të këqija, që nga shpërthimi i pandemisë së koronavirusit.
Në bilancin ditor të 3 ditëve të fundit, numri i viktimave e ka kaluar shifrën 100. Bilanci më i rëndë i vendit është ai i datës 17 prill, ku u regjistruan 126 viktima 4,353 raste të reja.
Ndërkohë në 24 orët e fundit, Turqia ka regjistruar 121 persona të vdekur dhe 3,783 raste të reja. Kështu numri total i personave që kanë ndërruar jetë nga COVID-19 ka shkuar në 1,890.
Deri më tani në Turqi janë shënuar 82,329 raste me koronavirus, duke ia kaluar kështu edhe Iranit i cili regjistron 80,868 raste.
Më shumë se 10 mijë persona janë shëruar nga virusi vdekjeprurës. Numri i rasteve aktive në Turqi është 69,986, ndërsa 1,894 pacientë janë në gjendje kritike për jetën.
Turqia është një nga 10 vendet më të prekura nga COVID-19 në botë. Sipas Worldometer, ajo renditet e teta në botë për numrin më të madh të personave të infektuar, pas SHBA-ve, Italisë, Spanjës, Gjermanisë, Francës, Mbretërisë së Bashkuar dhe Kinës.
Më shumë se 2,3 milionë njerëz nga e gjithë bota janë prekur nga virusi vdekjeprurës, ndërsa mbi 160 mijë persona kanë humbur jetën.
Që nga shpërthimi i koronavirusit, mbi 600 mijë njerëz nga e gjithë bota janë shëruar, ndërsa 1,571,681 raste janë ende aktive.
