Një veteriner turk i ka shpëtuar jetën një qeni dhe pothuajse të gjithë këlyshët, pasi i ka nxjerrë me duar nga rrëshqitja e dheut. Soner Büyümez ishte duke punuar në një fermë në një rajon të largët të Turqisë, pak pasi rrëshqitja e dheut kishte ndodhur në fillim të këtij muaji, kur dëgjoi një kafshë që ‘kërkonte’ ndihmë.
Veterineri vrapoi drejt vendit të rrëshqitjes së dheut, dhe shpejt u përplas me një qen endacak, i cili ishte futur në një strofull të vogël, i paaftë për të lëvizur.
“Pashë një qen të bllokuar në tokë. Vetëm koka e tij mbeti mbi tokë”, tha Büyümez duke shtuar se kafsha ishte në ankth të konsiderueshëm.
Veterineri heroik ishte në gjendje ta tërhiqte qenin femër duke e shpëtuar. Duke e ditur se nuk mund të largoheshin pa vazhduar kërkimin e tyre, Büyümez dhe bashkëpunëtori i tij u ulën në gjunjë dhe vazhduan të nxirrnin dhe këlyshët e tyre. Ata vazhduan të gërmonin për më shumë se dy orë, derisa arritën të nxirrnin gjithsej tetë këlyshë.
Një nga qentë kishte ngordhur, por nëna e tyre u ribashkua përfundimisht me shtatë të vegjlit e shëndetshëm dhe të fortë.
Pas përfundimit të shpëtimit të suksesshëm, Büyümez tha se beson se qeni nënë po mbijetonte në një farë mënyre vetë së bashku me të vegjlit e saj, pasi kishte arritur të krijonte një shtëpi të vogël për familjen e saj përpara se strofulla të binte në mes të rrëshqitjes së dheut.
Fatmirësisht qentë nuk do të duhet të kujdesen më për veten e tyre, pasi veterineri deklaroi se do t’i merrte dhe do t’i rriste si të tijat.
“Gjendja e tyre e përgjithshme është shumë e mirë. Nëna dhe këlyshët e saj janë të mbrojtur”, tha Büyümez. “Unë do të kujdesem për ta”.
Burimi i lajmit: dailymail. Përshtatur nga Tirana Today
