Sipas deklaratave të policisë turke, vetëm gjatë javës së kaluar janë arrestuar të paktën 15 persona. Ata janë arrestuar sepse kishin veshur një bluzë me mëngë të shkurtra, “T-shirt” me një parullë që është cilësuar nga autoritetet turke si një mesazh i koduar në mbështetje të organizatës që dyshohet të ketë zhvilluar grushtin e dështuar të shtetit vitin e kaluar.
Policia turke në të gjithë vendin ka arrestuar njerëzit që mbajnë bluza me fjalën “Hero” në gjuhën angleze, ku shkronjat janë të bardha, të vendosura në bluza të zeza. Sipas autoriteteve slogani është një mesazh i fshehtë që mbështet Fethullah Gulen, predikuesin islamik me bazë në SHBA, i fajësuar nga autoritetet turke për grushtin e dështuar të 15 korrikut, që synonte rrëzimin e Presidentit Rexhep Tajip Erdogan.
Polemikat në lidhje me bluzat shpërthyen më 13 korrik kur një i dyshuar si pjesë e komplotit, u fotografua duke shkuar në gjykatë me një T-shirt të bardhë që shkruante “Hero”. Ky veprim shkaktoi zemërim në rrjetet sociale, ku përdoruesit e cilësuan si një fyerje për 249 njerëzit e vrarë nga komplotistët e grushtit të shtetit. Erdogan tha se të dyshuarit e grushtit të shtetit duhet të veshin vetëm uniformat e burgjeve.
Ndërkohë që sipas raporteve të agjencisë së lajmeve Anadolu dhe Dogan, të paktën 15 vetë janë arrestuar gjatë javës së fundit për veshjen e së njëjtës bluzë. Mes të paraburgosurve ka qenë edhe i afërmi i njërit prej të akuzuarve për grushtin e shtetit. Gjatë ditës së djeshme, një kamerier që punonte në një hotel luksoz, u arrestua pasi dëshmitarët e panë atë të veshur me bluzë “Hero” ndërsa shkonte në punë, tha Anadolu. Në arrestimet e fundit gjithashtu edhe një çift u arrestua në Antalia. Çifti i ri janë të dy nga 22 vjeç, dhe pasi janë parë me bluzat “Hero” në një motoçikletë, janë ndjekur nga policia, tha e përditshmja Hurriyet.
Të paraburgosurit po mbahen nën akuzën “propagandë për një grup terrorist”. Ndërkohë që një përdorues në Twitter ka reaguar ndryshe.
“Qytetarët po denoncojnë njerëzit që veshin bluza ‘Hero’ dhe policia po i ndalon ata. Shoqëria jonë ka humbur tërësisht mendjen,” shkruan ai.
Përshtati redaksia Tirana Today
