Anglia ka marrë një fitore në minutën e fundit përballë Tunizisë, falë dygolëshit të Harry Kane. Në “Volgograd Arena” të Volgogradit për Tre Luanët ka qenë një ndeshje mjaft e vështirë e pushtuar edhe nga mushkonjat, por në fund kanë dalë me buzëqeshje.
Anglia e filloi ndeshjen mjaft mirë me një gol që në minutën e 11’ nga Kane, por deri atëherë Sterling dhe Ligard kishin shpërdoruar disa raste të arta. Shanset për të mbyllur ndeshjen pas golit ishin të shumta, por anglezët shpërdorojnë pa fund.
Dhe teksa tunizianët nuk kishin tentuar asnjëherë të bënin diçka në sulm, një kros pa pretendime detyron Walker të përdorë bërrylin ndaj kundërshtarit dhe për arbitrin është e qartë, njëmbëdhjetëmetërsh. Sassi barazon rezultatin nga penalltia dhe ndeshja nis nga e para.
Pjesa e dytë nuk është aq intensive sa ajo e para. Tunizia mbrohet më mirë dhe anglezët janë lodhur mjaftueshëm për të bërë atë presingun e fillimit të ndeshjes. Mundësitë për anglezët nuk munguan, dhe në minutën e parë shtesë ka qenë sërish Harry Kane që i ka dhënë avantazhin dhe fitoren Anglisë.
