Pas një pezullimi dy javor për shkak të çështjes së Teatrit, pritet që të rinisë sot puna në tryezën për Reformën Zgjedhore.
Përfaqësuesit e Këshillit Politik do të diskutojnë mbi çështjen e periudhës zgjedhore, financimin e fushatës zgjedhore, respektimin e kuotës gjinore, përdorimin e teknologjisë së informacionit dhe konkretisht, vendosjen e kamerave monitoruese në ambientet e votimit, rolin e Policisë në procesin zgjedhor, aktivizimin e bilbilfryrësve dhe klasifikimin e veprave penale në korrupsion zgjedhor dhe për pasojë trajtimin e tyre nga SPAK.
Sa i përket periudhës zgjedhore, është hedhur ideja që ajo të jetë në prill por megjithatë kjo do të diskutohet edhe më tej. Kjo pasi kjo periudhë përkon me festimin e Pashkëve dhe sipas ekspertëve, ul efikasitetin e fushatës.
Një risi që pritet të futet për herë të parë në kodin zgjedhor janë bilbilfryrësit të cilët konsiderohen punonjësit e administratës që raportojnë për parregullsitë në procesin zgjedhor.
Çështja e sistemit zgjedhor pritet të jetë përsëri në tryezë. Deputetja Rudina Hajdari ka kërkuar fort ndryshimin e sistemit aktual dhe adaptimin e një sistemi me lista të hapura. Sipas saj ndryshimi po bllokohet nga opozita dhe mazhoranca.
