Ministria e Brendshme ka reaguar menjëherë pas denoncimit të ish-kryeministrit Berisha, se një nga truprojat e Ramës ka ndërruar jetë, e një tjetër është në gjëndje të rëndë. Ministria, me anë të një deklarate për mediat e përgënjeshtron këtë lajm, duke nënvizuar se nuk ka pasur kurrfarë problemi për jetën dhe shëndetin e truprojeve të kryeministrit gjatë veprimtarisë së zhvilluar në Librazhd, apo në qarqet e tjera të vendit gjatë këtyre ditëve.
Ish-kryeministri Sali Berisha bëri më herët një postim të fortë në Facebook, ku thotë se sipas disa denoncimeve që ai ka marrë, një prej truprojave të Ramës ka ndërruar jetë, ndërsa tjetri është në gjendje të rëndë. Ai i referohet këtu incidentit të ndodhur në Librazhd, ku dy prej punonjësve të Gardës u përplasën nga eskorta e Ramës.
Denoncimi i Berishës: Ndërron jetë badigardi i Ramës, tjetri në gjendje të rëndë
Deklarata
Ministria e Brendshme nuk angazhohet në përgënjeshtrimin publik të insinuatave apo lajmeve të rreme që publikohen nëpër rrjetet sociale.
Por kur media të caktuara, që pretendojnë seriozitet dhe përgjegjshmëri publike, bëhen zëdhënës të tyre, Ministria e Brendshme e quan me dobi publike reagimin.
MB hedh poshtë me neveri insinuatën e turpshme të publikuar sot në disa media për kinse humbje jete apo plagosje të truprojeve të Kryeministrit gjatë provokimeve nga disa protestues të Partisë Demokratike në Librazhd, më datë 13.06.2019.
Nuk ka pasur kurrfarë problemi për jetën dhe shëndetin e truprojeve të Kryeministrit gjatë veprimtarisë së zhvilluar në Librazhd, apo në qarqet e tjera të vendit gjatë këtyre ditëve.
Ministria e Brendshme fton median e përgjegjshme dhe opinionin publik që të jenë shumë të kujdesshëm me insinuata të kësaj natyre haluçinante, të cilat kanë shpesh herë të njëjtin burim dezinformimi dhe që synojnë vetëm një gjë: krijimin e një klime pasigurie dhe paqartësie në vend.
MB i kujton opinionit publik se nga i njëjti burim, që ka publikuar së pari insinuatën e sotme, vetëm përpara pak ditësh, u përhapën trillime monstruoze që synonin të kompromentonin Policinë e Shtetit dhe t’i ngarkonin asaj paturpësisht përgjegjësinë për goditjen e dy protestuesve gjatë protestës së datës 2 qershor 2019, të cilat, siç u provua botërisht, kishin ardhur nga protestues të tjerë.
MB fton mediat që kanë publikuar këtë insinuatë kaq flagrante dhe në shpërfillje të plotë të parimeve profesionale të gazetarisë që të distancohen nga praktika të tilla, që të përgënjeshtrojnë njoftimin e dhënë dhe të marrin masa që në të ardhmen të mos ndodhin më raste të ngjashme dezinformimi.
