Trupa policore shqiptaro-amerikane, i ka ardhur në ndihmë familjes së Saimir Hoxhës, nënkomisarit të Policisë së Lezhës, i cili u vra në krye të detyrës nga 21-vjeçari Aldi Rama. Ato i kanë dhuruar familjes së të ndjerit 15 mijë dollarë, një formë për t’ia lehtësuar sado pak dhimbjen gruas e cila e vetme duhet të rrisë dy djemtë e vegjël.
“Heroit tonë të rënë”, shkruhet në çekun që është tërhequr nga bashkëshortja e Saimirit.
Nënkomisari, Saimir Hoxha, mbeti i vrarë në zonën e Kune Vain-it në Lezhë. Saimiri bashkë me kolegët e tij kishin shkuar në këtë zonë, dhe kishin asgjësuar një parcelë me 62 rrënjë kanabisi, por në rrugën e kthimit u përballën me disa të rinj ku një prej tyre Aldi Rama 21-vjeç e qëlloi për vdekje.
Saimir Hoxha është përcjellë për në banesën e fundit si “Dëshmor i Atdheut”. Në ceremoni morën pjesë figura të politikës nga kreu i shtetit Ilir Meta, kryeministri Edi Rama, kryedemokrati Lulzim Basha, Ministri i Brendshëm Bledi Çuçi si dhe kryetarja e Kuvendit Lindita Nikolla.
