Donald Trump ka ndryshuar mëndje, teksa ka nënshkruar paketën e ndihmës ekonomike për të prekurit nga pandemia dhe ligjin për shpenzimet qeveritare.
Kujtojmë këtu se ai fillimisht refuzoi të nënshkruante, duke thënë se dëshiron t’iu japë njerëzve ndihma më të mëdha. Por kjo vonesë ka bërë që miliona amerikanë të papunë të humbisnin përkohësisht përfitimet.
Paketa e ndihmës me vlerë 900 miliardë dollarë, është miratuar javën e kaluar nga Kongresi, pas disa muajsh negociata.
Ajo është pjesë e një pakete shpenzimesh prej 2.3 trilionë dollarësh, që përfshin edhe 1.4 trilion për shpenzimet normale të qeverisë federale. Mosnënshkrimi i ligjit deri në mesnatën e së hënës, ka rrezikuar edhe mbylljen e pjesshme të Qeverisë amerikane.
Rreth 14 milionë amerikanë të papunë janë përballur me humbje të pagesave të ndihmës. Këto përfitime tani do të rikthehen.
