Nga Greg Sargent “The Washington Post”/ Ngjarjet e ditëve të fundit, që kulmuan në takimin e presidentit amerikan Donald Trump me atë rus Vladimir Putin, e kanë bërë të pashmangshëm këtë interpretim:Trump është aktualisht duke
e shpërblyer Putinin, për ndihmën që ky i fundit i dha për të hyrë në Shtëpinë e Bardhë. Pavarësisht deklaratave mohuese në konferencën e përbashkët për shtyp të së hënës, kjo histori mbetet më këmbë.
Faktet e njohura deri më tani, tani e kanë përcaktuar atë përtej çdo dyshimi të arsyeshëm, dhe interpretimet e vetme alternative të kësaj historie, që mund të duket sikur kanë ndonjë kuptim, janë të neveritshme. Dje në Helsinki, Trump dhe Putin folën me gazetarët përpara se të nisnin takimin e tyre kokë më kokë.
Trump parashikoi se “do të përfundojmë me një marrëdhënie të jashtëzakonshme”, duke shtuar se “bashkimi me Rusinë është një gjë e mirë, dhe jo e keqe”. Por, ai nuk përmendi aspak ndërhyrjen e Rusisë në fushatën presidenciale të vitit 2016, si një nga temat që do të diskutoheshin.
Të premten e shkuar, prokurori special Robert S. Mueller, paditi 12 zyrtarë të inteligjencës ushtarake ruse, të implikuar në një grup të jashtëzakonshëm dhe të gjerë sulmesh kibernetike ndaj fushatës së Hilary Clinton dhe zyrtarëve të Konventës së Partisë Demokratike, duke pretenduar një komplot të detajuar për të sabotuar zgjedhjet, që krijuan lidhjen më të qartë me qeverinë ruse.
Megjithatë, Trump jo vetëm që nuk arriti të trajtont këtë çështje në takimin me Putin, ai por shkroi në Twitter:Marrëdhënia jonë me Rusinë, nuk ka qenë kurrë më e keqe, falë shumë viteve të marrëzisë dhe budallallëkut të SHBA-së, dhe tani gjuetisë së re të shtrigave!”.
Duke fajësuar vetëm udhëheqjen e mëparshme amerikane, dhe hetimin aktual të Mueller për marrëdhënie të këqija me Rusinë – dhe jo sulmin e Rusisë ndaj demokracisë sonë, që është veçanërisht i tmerrshëm, tani që është përshkruar në detaje të reja – Trump po zgjedh nje qasje nga e cila përfiton ai vetë.
Ai po i jep gjithashtu një dhuratë Putinit, duke sinjalizuar se do të vazhdojë të bëjë gjithçka që është e mundur, për të delegjitimizuar përpjekjet për zbardhjen e të vërtetës së plotë rreth ndërhyrjes së Rusisë. Dhe nga ana tjetë i thotë indirekt Moskës, se mund të vazhdojë përpjekje të tilla edhe të ardhmen (zyrtarët e inteligjencës amerikane, kanë paralajmëruar se ndërhyrje të ngjashme do të ndodhë në zgjedhjet e mesit të mandatit në nëntorin e këtij viti).
Në njëfarë kuptimi, duke e bërë këtë, Trump po bashkëpunon për ndërhyrjet e reja që pritet të ndodhin. Aktakuza e Mueller, zbulon në thelb se Putini e ka gënjyer dje Trumpin dhe mediat gjatë konferencës për shtyp, në lidhje me shkallën dhe qëllimin e përpjekjeve të sabotazhit rus. Por Trump tani po mjaftohet me këtë gënjeshtër të konfirmuar, dhe ai ende nuk e ka marrë seriozisht këtë akt sabotazhi. Mos harroni, vetë Trump i bëri thirrje Rusisë për të hakuar e-mailet e Clinton.
Dhe sipas një raporti nga “ThinkProgress”, Trump tërhoqi publikisht vëmendjen tek materiali i rrjedhur nga WikiLeaks – që e mori atë nga Rusia, sipas aktakuzës së Mueller – më shumë se 100 herë gjatë fushatës.
Ne nuk e dimë sa ndikim ka pasur ky sabotim. Por, siç thotë strategu demokrat Simon Rosenberg, përtej fakti që shumë vota u zhvendosën drejtpërdrejti nga njëra anë në tjetrën, punimet normale të konventës së demokratëve, u pamundësuan nga sulmi kibernetik në një moment kritik, i cili duhej të kishte pasur një lloj ndikimi serioz.
PËRSHTATI: TIRANA TODAY
