Presidenti në detyrë i SHBA-ve Donald Trump vijon me deklaratat e tij se zgjedhjet presidenciale ishin të manipuluara.
Përpara një turme mbështetësish në Washington, kandidati republikan tha se nuk do ta pranojë kurrë humbjen në zgjedhjet presidenciale ndaj demokratit, Joe Biden.
Po ashtu ai deklaroi se Presidenti në detyrë së bashku me ekipin e tij do të ndalojë vjedhjen. “Ne kurrë nuk do të dorëzohemi, nuk do të pranojmë kurrë. Ne do të ndalojmë vjedhjen.”– tha Trump.
Trump është shprehur se këto zgjedhje ishin vjedhja më e madhe në historinë e SHBA-së. Protestuesit kanë insistuar se presidentit Trump i është bërë padrejtësi nga ana e demokratëve.
Më herët, Trump ka pasur përplasje me zëvendësin e tij, Mike Pence, lidhur me çështjen e votave.
Pence e kishte njoftuar presidentin Donald Trump se nuk e ka autoritetin për të bllokuar certifikimin e presidentit të zgjedhur Biden, kur Kongresi të përfundojë votat elektorale.
